भानुका सिर्जनाहरु : कविता~ समानान्तर

कविता~ समानान्तर

सदीयौंदेखि अक्कर बनेर
उभिएको छ मेरो सामु
केहि असान्दर्भिक
केहि सान्दर्भिक

नयाँ र पुराना पुस्ताहरुका

जेनेरेसन ग्यापको अमिलो यथार्थ ।

राडीपाखीका खेलो गर्दै

सोलुका शेर्पा दाई

तराई ओर्लेको बेला

समानताको आँखा हेरेर

नेपाली भनियोस्

भाँडा बर्तन साट्न– बेच्न

तराईका भैया

पहाडतिर उक्लेको बेला

आफ्नोत्वको साईनो लगाई

नेपाली भनियोस् ।

किनकी

हाम्रो भूगोल

विबिधतामा रमाउँछ

त्यही विबिधता भित्रको एकतामा

नेपालीको पहिचान छ ।

यो भूगोल

हिमालबासीको हो

पहाडबासीको हो

अनि तराईबासीको पनि हो ।

आदिम मान्छेका दर सन्तानहरु

बन्चित नबनुन

उनैका पुर्वजहरुले

बिराएका खोरियालाई भोग्न

धपाईनु हुन्न अब थेप्चेहरु

भर्तिका बहानामा

मलायातिर ।

अब बिभेद मासिनु पर्छ

देश सिगार्न– बचाउन

सबैको सहभागिता हुनुपर्छ

यहाँ धर्म हेरिनु हुन्न

यहाँ जात हेरिनु हुन्न

यहाँ बर्ण हेरिनु हुन्न

र, भूगोल नापिनु हुन्न ।

यदि नाप्नै पर्छ भने

हामीबिचको मित्रताको आत्मियता नापौं

हामीबिचको शत्रुताको खाडल पनि नापौं

नापौं छातिभित्रको नेपाली हृदय

नापौं आँखाको दुरदृष्ट्रि देख्ने क्षमता ।